زى ايه ؟ شعر بالعامية للدكتاتور العادل

زى ايه؟

عجبى يا صاحبى
بتسأل زى ايه ؟
انا زى ايه ؟
زى مسجون بين حيطان من ذل
زى مهزوم بيلاقى الهوان من بين الحيطان بيطل
زى مظلوم على جنابه يدوس الكل
تلاقينى زى مسجون
زى مهزوم
زى مظلوم
لكن صابر
ودايس فوق كل احلامى وكاتم
فى نفسى
كل انواع العذاب والمر

سجانى هنا
ظالم اجير
احساسى بيه
احساسى بالسجن الكبير
ماطرح ما اروح بالاقيه
قدامى
ورايا
جوايا
فى نفسى اللى عايشه معايا
فى ذلى اللى على قلبى
راسم بلايا
فى كل خطوة من خطايا
فى انفاسى
فى احساسى
فى راسى عمال بينقب
زى ما تقول مرض
عمال يحطم فى حواسى

يا عالم دنا انسان
ليا قلب وروح
يا عالم دنا احساس
وان زاد على الهم ما اقدر ابوح
لامتى هاقدر اشيل
دا حمل تقيل
وفين راح اروح

ولما بيزيد الظلم
بيموت اللسان
والقلب بس اللى بيقدر يعبر
لكنه جوه غريق
والخوف لو اتكلم
بياكلوه الحيتان

يا صاحبى
انت يس اللى باقدر اشكيله
ولما عليا بيزيد الحمل
بتشيله
ياللى فى وسط الضلمه
باقدراناديله
خلليك معايا هنا
دنا فى وسط الديابه
فرد وحيد
وان جه عليا الليل
فكرى يزيد ويزيد
وانا موش حديد
عايزك معايا تكون
ولو بقلبك
دنا لو يكون قلبك معايا
هقدر اعيش
بس ماتسبنيش
دنتا ما تعرفشى
ازاى هنا
الحب مافيش
وازاى بيموت الواحد مننا
فى اليوم
مليون مرة
ولا بنقدر نخرج من الظلام بره
ولا بنشرب هوا الحرية حتى نعيش
ولا بناكل اللقمة الا بالالم
ولا ننام الا على اوسخ حشيش

والقهر فى النفس يا صاحبى ما اقولاكشى عليه
دا شىء كتير
وكسرة النفس اللى كنا بنسمع عنها
شفناها بعنينا
وعايشه معانا
مابتنتهيش
بعد ما كان الواحد مننا
يملا هدومه بعد ما كان بيمشى ع التراب
وراسه فوق
بعد ما كان بيملى الارض شوق
بعد ما كان الحب وحده بيشبعه
والحب برضك يرفعه
والوقت بين حب الحبابه
مضيعه
راح الزمن فوق الديابه
موزعه
ومقطعه
وممزعه
لمابقينا بعد عالى فى طين
لم صبحنا بعد عز
مهزأيين
يرضيك يا صاحبى انا
وانت عارفنى صحيح
يرضيك اهون بايدين كلاب مابتساويش
يرضيك تشوف الحر عبد ما يرتويش
يرضيك تشوف العدل ظلم ما ينتهيش
ان كنت ترضالى الهوان
مايهمنيش